商台DJ少爺占（甄子康）大前年自爆同幼稚園同學冼燕珍秘婚7年，囝囝甄和天𠵱家已經兩歲大，上個禮拜六下晝5點，一家三口嘆平民下午茶，喺筲箕灣某連鎖快餐店被讀者唐先生透過「爆相爆片」捕獲，着背心街坊裝嘅少爺占邊食邊𠱁仔。
「想佢長肉啲」
唐先生接受電話訪問話：「佢哋嗌咗tea set，有雞髀有西多士，少爺占大部份時間都同老婆傾偈，又𠱁小朋友食嘢，小朋友全程坐定定好乖冇扭計。」當日囝囝用手扮影相，少爺占即刻瞇眼舉V字手勢，佢話：「好吖，幫我影相。」
馮仁昭打畀少爺占問佢家庭樂嘅事，佢笑住話：「呢餐純粹陪太子食tea，我哋好慳㗎，一個餐三個人分，哈哈。阿仔平時喺屋企唔食肉，咪帶佢落樓下食雞髀囉，佢杯紅豆冰走奶走冰㗎，紅豆有益嘛，喺餐廳佢胃口好啲，想佢長肉啲，唔好似我咁！」少爺占仲話之前同囝囝去日本旅行，日抱夜抱搞到瘦底嘅佢，兩隻手臂練到有肌肉：「無時無刻要我抱，好似舉啞鈴咁，嚟緊9月伊館開騷，可以騷肌畀人睇啦！」
撰文：馮仁昭
