中國恒大（3333）近排加入萬科（2202）爭奪戰，大家都好想知道恒大掃萬科的原因同下一步點做，下周二就到恒大業績，但華華就同公關八到，原來主席許家印唔會到！只係得副主席兼行政總裁夏海鈞同首席財務官兼執行董事謝惠華現身。
其實華華睇番紀錄，自恒大2009年11月上市以來，每年中期及全年業績許家印都會親自到場，發表吓偉論。即使在2012年6月俾沽空機構Citron Research（香櫞研究）狙擊，許家印在8月都親身出席業績會，今次唔通有重要事？
華華都有向公關追問，但對方就再無回覆啦。但提提大家，在啱啱星期一萬科中期業績會上，萬科主席王石同總裁郁亮都齊齊無影，話要協調股權問題。今次輪到許家印無影，唔知有無關係呢，大家自己諗啦。