奧運剛落幕，雖然跳繩未被列入奧運項目，但其實我哋嘅跳繩港隊（港隊01）一向表現出色，香港跳繩代表隊剛喺「世界跳繩錦標賽」勇奪79面獎牌，今次已經係佢哋第3次奪得世界冠軍，仲連財爺曾俊華都大讚佢哋，要同呢隊冠軍人馬一齊跳繩自拍。
港隊01嘅5名運動員只係大專生，但已有10年以上嘅花式跳繩年資，噚日全隊首次喺大嶼山昂坪公開表演，更即場創下「交互繩30秒前空翻」紀錄，喺30秒內打咗14個前空翻，主教練話暫時未有人對呢個跳繩項目作紀錄，「唔知有無人其實可以打破我哋紀錄，但至少我哋打破自己紀錄」。
隊員盼有更多資助
其中首位華人跳繩世界冠軍何柱霆亦係隊伍成員，佢即場表演「單人繩30秒二重跳」時，喺30秒內跳咗91下，刷新兩年來嘅個人紀錄，但未打破4年前約96下嘅個人紀錄，但已好滿意。
噚日港隊01表演，財爺亦有到場支持，財爺話喺網上欣賞過隊伍演出，「網上睇快到以為老花」，更即時同港隊01一齊跳繩同selfie，不過原來政府好少資助呢隊世界冠軍，以今次到瑞典參加世錦賽為例，5名運動員連教練共需支付12萬元，但政府只肯資助每人約2,000元，各成員需自費約2萬元，佢哋話好希望政府可以畀更多支持同資助。既然財爺咁欣賞，應該諗諗係咪要畀多啲資源支持喇。
李八方
mailto:[email protected]