【本報訊】Grand Yoho標準戶有1,084伙，當中三房僅約三成。發展商新地（016）首兩張價單，只係推出第2座B室（實用面積613方呎，普通三房戶），同埋9座A室（實用面積774方呎，三房一套連儲物室及廁）兩種戶型，夾埋都係得大約65間咁大把，其中9間仲要扣起冇拎出嚟賣，所以星期六可以揀嘅三房唔夠50間。三房入場最平第2座7樓B室，即供折實632.8萬元，呎價1.08萬元，大廳同兩間睡房，都係向西望新元朗中心，只有一間睡房向北，高層視野有機會穿過東頭，離遠望到南生圍。目前2座B室，由7樓到47樓都開晒價，當中16、17、35至38樓星期六扣起唔賣住，最高47樓即供折實829.5萬元。
至於景觀較佳的9座A室中高層單位，到30樓折實樓價，經已逾千萬元，星期六30樓以上的靚景單位只會有8間（31到37樓、47同48樓）。