【本報訊】示範單位長期逼爆嘅新地（016）元朗Grand Yoho，星期六將首度開售308伙，去到噚晚收票大約1.4萬張，即約平均45個人爭1伙。不過兩份價單夾埋169頁紙，條款多又深。今次特地針對唔同類型準買家整合出Grand Yoho全攻略，搵出最啱大家心水嘅單位，幫助準買家星期六揀樓。
記者：陳東陽
首期預算比較緊張嘅買家，可能連按保做八成盡按，Grand Yoho星期六賣樓當日，有大約49間兩房單位，以即供18.25%優惠，折實之後600萬元內，連按保可以做到八成按揭。
其中37間都喺第1、2座「西斜單位」，只可以對住元朗中心樓景，所以有600萬元預算，都可以揀到去21、22樓啲中層單位。如果手緊得嚟，又有啲要求，可以考慮第1、2座D室望內園單位，而且仲係向東，但最高只可以買到11樓，對比兩座樓宇分別34層同38層只屬於低層。
Grand Yoho周六發售即供折實600萬內兩房單位（實用面積498到543方呎）包括：第1座6樓至21樓A室、7樓及8樓D室、第2座7樓至11樓A室、7樓至11樓D室、7樓至11樓Ｇ室、7樓至11樓及16至22樓H室、第9座7樓至11樓G室。