今季英超Best buy仲未有定案，不過利物浦右翼鋒沙迪奧文尼就一定係候選人之一。喺周二嘅英聯盃第二圈，紅軍就作客伯頓，沙迪奧文尼傷癒復出即刻交出兩個助攻，以5:0大勝對手晉級。如果唔係文尼上仗聯賽對般尼因傷缺陣，睇怕嗰場波未必會輸，搞到破咗開季不敗身。講開傷兵，紅軍都係傷兵多，之前長唞嘅史杜列治終於回勇，今仗入兩粒，但德國中場安利簡恩因足踝受傷而喺下半場退下火線，好彩領隊高路普賽後話簡恩傷勢唔算嚴重。
除咗晉級，紅軍都仲有好消息，中堅馬馬度沙高之前因為誤服減肥藥被禁賽，家陣世界反禁藥組織（WADA）決定唔再對佢提出上訴。沙高已經停賽一個月，總算刑滿可以復出，不過就算擺脫咗禁藥陰霾，但之前因為紀律問題，被高路普取消去美國踢國冠盃嘅機會，睇怕之後都會被借走。