昨日講及在德己立街大聲評論新加坡之獨立，估唔到引起馬來西亞女遊客嘅回應，左丁山與兩位朋友港大名醫大感意外。名醫C話：「嗱，說話不可亂講，你喺香港街頭講就冇事啫，在吉隆坡咁樣講，可能會引起密探跟蹤，喺烏節路更加唔好出聲呀！」
大家都為之啞然失笑。事實上，馬來西亞女遊客羨慕新加坡之言，左丁山在吉隆坡坐的士亦聽司機（華裔）講過，不少馬來西亞華人都認為1963年睇死新加坡唔掂，但40幾年後就欣賞／妒忌新加坡不已，馬來土著巫統管治大馬幾十年後，處處落後於新加坡，兼且實施土著優先政策，令華人更加不是味兒。
講新加坡在1963年不願獨立，而係被馬來西亞踢出嚟，並非隨口噏，8月7日明報星期日特刊有一篇詳細訪問，英培安講自由在一個城市很重要，文章寫得好（作者趙曉彤），係一篇非常值得細讀嘅訪問。英培安咁樣講：「香港真是不容易。香港人唯有影響大陸人的價值觀……但怎樣令大陸人改變呢？你要獨立嗎？如何獨立？人道立場，中國不可以攻打香港，但中國會不會鎮壓？我不知道。不少人把香港與新加坡比較，認為新加坡面積比香港小，也可以獨立，可是當年新加坡的經濟很差，它是被馬來西亞踢走的，馬來西亞覺得你死定了，一定會回來求我，沒料新加坡會愈來愈好……可是，中國不會踢走香港」。
英培安何許人也？佢係2003年新加坡文化獎得主，2004/2005年獲新加坡文學獎，所著小說「畫室」已有英文及意大利文譯本，將來獲提名競逐諾貝爾文學獎都唔奇，英培安讀書時，寫過文章批評政府，參加過學生會運動，畢業後辦「草根書室」，1976年來港渡蜜月，發覺香港充滿「顏色」，言論與創作多姿多采，唔似得新加坡咁「一種聲音」，回去不久就被捕，受監禁五個月，冇charge，冇上庭，冇定罪，獲釋後不能出境，搬家要通知警局，直至80年代先至恢復行動自由，於是每三個月就來港一次，1994年索性到港居住一年，投稿星島日報與香港聯合報，靠稿費糊口，住在屯門一個三百呎單位。後來回新加坡專心寫小說成名。我地睇英培安幾十年來經歷，就知道自由之重要，政府儘可由選票產生（如新加坡），但政府一旦以國家安全為理由，訂立「內部安全法（ISA）」，就可以一紙秘密命令就將一個異見者秘密囚禁無限期咁耐，唔需要審訊。林鄭月娥最近講幾年內要討論基本法23條，香港人不可掉以輕心，到時一定要逐條細節討論，不能令新加坡ISA在香港出現。