噚日網上瘋傳一段短片，一名身穿皮褸的女子不滿被男童的紙飛機「篤背脊」，爆粗質問男童「你姓乜X嘢㗎？」繼而衝向男童起飛腳，再與相信是男童母親爆發罵戰，狂爆粗問「你邊X度㗎？」又自稱是「李大當家」。男童母親為兒子道歉後，要對方也要為打人道歉，但皮褸女隨即否認打人，至短片結束她都冇道歉。此片一出，唔少網民鬧爆呢位「李大當家」恰細路。
有建制組織噚日見呢段片網上瘋傳，就即時借勢抹黑公民黨，喺呢段片開頭加上「公民黨黨員李慕蓮當街打小童」字眼，再喺多個親建制藍絲facebook專頁包括「香港漢奸活動觀察小組」等轉載。
公民黨主席余若薇（圖）噚日見到呢段片，隨即喺facebook澄清，強調公民黨並無黨員叫「李慕蓮」，佢亦唔認識該名自稱「李大當家」的港女，批評藍絲「好心抹黑都要有啲水準，做吓功課，亂嚟真係笑死人」。