【本報訊】元朗一街嘅地產代理推廣街站，好多都以折實呎價最低9,931元推銷Grand Yoho，話呎價唔使一萬元。睇真啲價單，如果用即供最高優惠18.25%計，折實呎價1萬元內單位只有兩間，位於第9座7樓同8樓G室兩房單位，呎價分別9,931元同9,968元，去到9樓G室，呎價已經跳升到10,328元。
區內代理話，同區Yoho Midtown目前二手實用呎價大約1.2萬元，至於平均呎租就大約31元，當中以兩房單位比較受租客歡迎。Grand Yoho首兩張價單推出347伙，有大約160伙即供折實呎價低過1.2萬元，主要屬於中低層單位。不過發展商噚日出銷售安排，再扣起當中32間唔賣住，換言之，星期六得大約130伙呎價較低嘅單位推出。
是次推售單位中，大部份呎價低過1.2萬元嘅單位均屬中低層，只有第9座E室例外。目前由7樓到50樓共39伙已經開價嘅標準戶，實用面積一律592方呎，屬於面積較大的兩房單位，以即供折實呎價計，全數39伙低於1.2萬元，去到50樓折實呎價都係1.16萬元，當中9伙12到21樓單位不包括在周六發售之列。
雖然呎價平，但景觀主要望Grand Yoho第三期，而後者目前仍未展開工程，料2021年12月底方落成，單位住戶未來可能受施工的噪音及沙塵影響。
以第9座中層30樓E室推算，即供折實售666.89萬元，假設入伙後以呎租31元租出，扣除每呎3.95元管理費，預期每月租金收入約1.6萬元，預計回報率唔夠3厘。