此日到陸羽飲茶，見到大批港大校友，左丁山張枱已有富翁V，餐飲M與律師W三人，律師W話另外一張大枱多是港大律師、大律師，此外又有港大法律學者張達明及房協主席鄔滿海分別與朋友坐在其他兩張細枱。食食吓，兩位港大名醫上午診症完畢，又走上來醫肚。
港大校友在中環勢力龐大，業豐大廈有港大校友會會所（即是港大校友中區飯堂），有「陸羽阿二」之稱，招牌菜式與陸羽大部份雷同，價錢就平啲，曾吸引不少食客，致有人滿之患，左丁山都有上去食過，後來可能因為生意太好，只限招待港大校友，於是我等冇資格上去，現時生意如何，已無一手資訊。
有中大校友話港大咁威，中大校友也應該在中環搵一個據點，開設中大校友會會所食堂，等中大人在中環有聚腳地方。左丁山素來反對呢個意見，因為人家有大富豪何鴻燊及文洪磋等老校友捐款買樓，老早成立中環會所，唔駛交租，先至可以維持咗幾十年，中大校友之中，好似冇邊一位係何鴻燊喎，依家中環寫字樓售價貴，租金貴，點搞會所呀，貪玩咩，將來蝕大本由邊個去負責埋單？
飲完茶，與兩位港大名醫一齊落樓，邊行邊傾，講到港大學苑談港獨，兩位名醫都認為根本大部份學生與香港人都唔認同港獨，如唐英年所言，係「食飽飯無事做」，可以不理！偏偏梁振英要大張旗鼓，首先發炮攻擊學苑，先至引起大眾注意，如梁振英者，實在係「小事化大」嘅專家，有其政治目的。左丁山就認為港獨可以討論，但文化上、歷史上、經濟上，根本係一個偽議題，純粹係為辯論而辯論，絕對無法實行。有人講到新加坡咁細都可以獨立，點解香港唔得？左丁山對兩位名醫講：「其實係馬來西亞要踢新加坡出局，睇死李光耀搞唔掂之嘛！」當時人在德己立街，行人如鯽，聲音嘈雜，故此左丁山講得幾大聲，想不到竟然有一位女士搭嘴：「係呀，我地好激心呀，新加坡做得咁好。」愕然之下，問吓位女士：「點解咁講？」女士話：「我地幾位係馬來西亞遊客，聽見你咁講，想唔到香港有人講新加坡獨立，當年真係馬來西亞唔要新加坡嘅，唔係新加坡要搞獨立，但依家新加坡好過我地咁多，你話幾激心吖。」哎，世界上只有一位李光耀，不世之梟雄也，可能係空前絕後之亞洲人辦，香港點會有呢種人才吖。