位於中環海濱嘅《Slide The City Hong Kong香港站2016》夏日party今日正式開放畀大家玩。鄧洢玲(阿旦)同夏雨兒子黃奕晨昨日率先試瀡大型滑水梯，台高約10米，滑水梯長逾150米，睇落又高又斜，似乎幾刺激，現場更設人造沙灘，仲可以飽覽維港景色，大曬日光浴。成個場製作成本約2,000萬，呢個梯仲係全亞洲最長，單係滑水梯都近千萬。現場所見，瀡速明顯比上次有改善，水量都增多，但始終條梯好長，斜度爭少少，有啲位瀡落嚟會慢咗，工作人員好醒目立即埋去推一推，起碼唔會「卡」住。