尼馬呢個夏天真係幾完美，球場同情場兩得意。佢日前先幫巴西如願，贏咗國家史上首面奧運足球金牌。佢之後去睇奧運男排決賽，見證埋巴西男排贏冠軍。睇完男排之後，尼馬同前女友布魯娜去商場食飯，令人懷疑佢兩個舊情復熾。當佢哋行出餐廳嗰陣，尼馬被一大堆粉絲包圍攞簽名，而布魯娜就走先，不過佢兩個都冇回應係咪復合。尼馬同布魯娜都離離合合，喺兩年半前分過手，但巴西世盃嗰排復合咗，不過完咗世盃又再散過。
如果尼馬有心翻撻布魯娜，就要把握嚟緊呢個星期啦。事關巴西國家隊星期一公佈咗九月世盃外23人名單，召尼馬出戰，巴塞都格外開恩，叫尼馬踢埋世盃外，去到下月中先歸隊，意味住尼馬有多一個星期假期，唔會喺嚟緊呢輪作客畢爾包嘅西甲為巴塞披甲。23人名單仲有加比爾巴保沙同加比爾捷西斯兩位奧運兵。另外，喺巴塞星期日操練後，新加盟嘅中場安祖高美斯揸車走嗰陣，輕輕撞到蘇亞雷斯架車嘅車尾，好彩兩個人都冇事。