美國泳手洛捷迪喺里奧期間虛報遇劫搞到身敗名裂，雖然佢獲《兔女郎》女友姬絲（Kayla Rae Reid）支持，但贊助商就唔撐佢，Speedo、Ralph Lauren、Airweave同Syneron-Candel都宣佈同佢解約，Speedo更表明會將佢嗰五萬美金（約39萬港元）出場費捐畀慈善機構。美國傳媒估計，洛捷迪呢個大話，令佢唔見咗200萬美金。另外，洛捷迪隊友兼喺里奧再添五金一銀嘅費斯，舊年12月喺阿里桑那買咗一間佔地6,010平方呎嘅大屋之後，豪花250萬美金（約1,938萬港元）大執，變成一間有五個睡房同埋室外泳池嘅豪宅。