呢排行街不時遇上選舉義工派單張，有人收錢做嘢、亦有唔少心係飛來猛，不惜捱更抵夜為心儀候選人助選，令候選人好滾動。
港島區公民黨陳淑莊有年僅18歲嘅準港大學生蘇曉嵐幫拖，佢透過Tanya網站主動申請入義工團，至今派單張同開街站十幾次，雖然每朝晨早六點就要起身，但佢話好值得，因為認同Tanya嘅理念，希望佢入立法會後為保育等議題發聲。Tanya話義工團係佢選戰最大資產，非常感激咁幫忙。
新東出戰嘅民主黨林卓廷就有媽媽級義工相助。劉太非新東選民，卻為林跨區日曬雨淋，原來劉太囝囝去年由外國回港報港大，卻因為一個小遺漏影響升學。後尾佢搵劉慧卿同阿廷幫忙，身為北區區議員嘅阿廷覺得可以跟進，有次同港大講述個案，希望對方覆檢，最終港大跟進咗，劉太囝囝成功獲港大取錄，促成呢段義工情緣。該區其他參選名單，請參閱本報立會選戰網站 http://hk.apple.nextmedia.com/legco2016/region 。