陳浩民內地妻蔣麗莎（Lisa）五年抱四，兩公婆經常在網上晒恩愛，日前Lisa又在網上貼短片，但今次她並非上載溫馨家庭照，而是有蟲的雞肉相，Lisa留言鬧爆說：「超市太惡心了……有活蟲子在雞肉裏面來回爬！」
據知，喜歡下廚的Lisa大前日在紅磡屋苑樓下的超巿買餸，打算煮飯𠱁在內地開工後返港的老公陳浩民，其間Lisa打開一包剛買回來的雞肉，準備洗淨後煮來吃，未料打開即嚇她一跳，事關發現雞肉內竟有爬行的小昆蟲，而且頗生猛在行來行去，故Lisa即時拍片放上網。
「當然唔會煮」
短片所見，雞肉由原價19.9元減至10元，《蘋果》昨日聯絡Lisa，她透過WeChat回覆：「呢包雞肉喺我家樓下間超巿買嘅，本來想煮咖喱雞，現在沒有用雞肉了。」Lisa續謂：「我最後都係丟咗佢，為家人健康安全着想，當然唔會煮嚟食啦！」
Lisa認為雖然雞肉是減價品，但超級巿場的食物，應該要令人食得安心又放心，她說：「我覺得超級市場需要嚴謹認真啲去做食品安全監管，咁樣消費者先至會買得放心。」
採訪：楊定
