港股之前四連陰，然後連續兩日憑住收市競價時段嘜高，令恒指收番陽燭，否則高位六連陰嘅話都幾肉酸，亦突顯收市競價時段嘅弊病，就係容易造圖，淨係睇日線圖，唔睇5分鐘圖，會好易俾人呃。
後市唔易估，保險地估恒指受制月線圖保歷加通道中軸而下跌嘅話，都有分大跌定係小跌，策略上都有所不同。估大跌嘅話，最好乜股都唔買；估小跌嘅話，都仲有避險概念嘅金礦股可以買。星期二招金（1818）升3%，明顯係有人博緊稍後避險情緒升溫。
喺跌市初期，金礦股勝算的確偏高。而對金礦股最有利嘅情況，就係大市出現約1,000點嘅微調整，資金鏈冇斷裂，游資仍充裕，但又要搵地方避險，於是湧入黃金，招金到時要試10蚊高位都未必難事。要慎防，稍後嘅港股可能大跌，到時金礦股抗跌極都要跟跌。買金礦股應該喺跌市早期作短線持有，呢一刻係上車時候，去到大市跌幅有擴大迹象，就要沽出獲利。
如果港股頭好快調整完，頭也不回，然後變番升市又點？仲簡單，睇吓金礦股有冇跑輸大市，跑輸咪拿拿臨沽走佢咯。
晉佳
http://www.fb.com/advanceguy1
本欄逢周一、三、五刊出