選舉殺到，黑材料梗係不遲不早較啱timing嚟曝光，似乎率先中箭嘅係公共專業聯盟會計界嘅候選人梁繼昌。有周刊噚日報道，話梁繼昌同佢前助理兼前社運中堅周澄喺2014年傳出曖昧關係，關係直至周澄前年赴英讀書，但全文無相又無片，好有抹黑feel。梁繼昌話唔會對有關「故事」作任何回應，已將事件交律師處理；周澄亦指對事件冇回應。
指不回應故事
《東周刊》噚日頭版報道梁繼昌同佢前政策研究助理周澄喺2014年有過一段情，報道以「傳梁繼昌周澄婚外情」為標題，內容聲稱兩人互傳「掛住你」、「我的心很痛」等信息，又話兩人曾為一張匯票嘅問題有過錢銀轇轕，但報道冇附上任何證據。
八方問過梁繼昌，佢回應話：「不會對有關故事作出任何回應，並已將事件交由律師處理。會繼續努力進行未來的競選工作。」周澄亦話唔回應。咁又係，如果係故事，又有乜好回應，唔驚沒完沒了？尤其選舉前嘅抹黑招數，嚟嚟去去不外乎錢銀或桃色，為打擊泛民可以去到幾盡，大家有眼可見。
有花生友就話，可能見梁繼昌同對手陳弘毅選情勢均力敵，所以流出疑似黑材料打擊？其實佢兩個噚日喺商台同場辯論，但冇提呢單緋聞。梁繼昌則追問陳弘毅獲北京市政協動員支持，陳就話唔清楚事件，對此感到好驚訝喎。
李八方
mailto:[email protected]