奧運曲終人散，李慧詩單車場上奮戰、林丹李宗偉世紀大戰、菲比斯保特神級奪金記錄，一幕幕震撼人心，但可能過多幾個月就冇人再提。唔想做忽然運動迷，除了平時多點留意體育消息，亦可由漫畫入手。《入樽》、《足球小將》阿媽都唔識就唔講喇，介紹以下8套熱血運動漫畫，等大家延續運動狂熱。
我要高飛
日本體操王子內村航平奪得個人全能和團體賽金牌，他於個人資料中最欣賞體操運動員一欄寫著「藤卷駿」一名，阿駿唔係咩經典選手，而係漫畫《我要高飛》主角。《我要高飛》由80年代金牌選手森末慎二做由原作提案，入面體操動作講究，更帶出咗「開心玩體操」概念，對體操比賽刻板的計分模式有深刻的反省。
單車小霸王
單車作品唔少，新生代的《飊速宅男》在日本很紅，但講經典，一定係《單車小霸王》。雖然唔係香港人熟悉嘅場地賽，主角野野村輝專攻山路公路賽，佢係不折不扣的單車痴，炒車重傷克服傷病再踩過，雖然每次都踩到冇命咁，但睇完你都想專心一致挑戰極限。
排球少年
仍在連載中嘅嘅寫真系排球漫畫，冇超必，畫風又易入口，睇完你就知排球點分扣球手、托球手、攔網手等不同崗位，唔會好似荷蘭叻咁問點解自由球員咁自由都要打後排。
第一神拳
打拳可以打足110幾期，為最長壽體育競技漫畫。雖然近年劇情流於俗套，但輪擺式移位、青蛙拳等等經典有型招式教人印象深刻，主角幕之內一步靠熱血毅力一步步上位，不過最愛都是自大多咀的大師兄鷹村守，連熊都打得低夠霸氣。
十項全能
田徑多人看，但相關漫畫卻很少，《十項全能》也屬重口味作品。畫風另類，但卻能展現出田徑運動的肉體美感，主角風見萬吉冇腦兼鹹濕，冇乜苦練但次次都能破紀錄贏冠軍，但其野性比賽畫面卻教人看得過癮，好似睇保特咁，屈機但睇得開心。
柔之道
主角豬熊柔自細受家人所迫學柔道，極有天份但偏偏想做個平凡女學生。92年漫畫正談及阿柔參加巴塞隆那奧運，剛巧現實中的谷亮子選手以16歲之齡奪得奧運柔道銅牌，之後她在00和04年兩屆都取得了奧運金牌，日本人都稱她作阿柔。
乒乓
漫畫大師松本大洋畫的作品，講述兩個天才乒乓球手，一個天性懶散，一個則自我封閉，打波對於佢哋嚟講唔值得咁搏，但兩個人開始透過比賽了解到運動競技嘅魔力，有如李宗偉和林丹，有對手有勝負才能顯示才能。
足射手球神
港漫代表，最多人識嘅《至Goal無敵》以搞笑為主，《足球神射手》雖然只有四期，但內容提及球員賭波、屋企人女朋友唔睇好、打假波等黑暗面，頗有特色。
記者：司徒港燊
攝影：潘志恆
