參選九龍西嘅劉小麗教書出身，咬字清晰，佢噚日喺有線選舉論壇再次狙擊新思維狄志遠，繼早前斥新思維係「新思維穩部隊」，小麗老師仲幫民主黨劉慧卿向狄志遠翻舊賬，話狄志遠1994年就卿姐提出嘅全面直選立法會私人草案投棄權票，令立法會錯過全面普選機會，批評狄志遠「阿爺吹雞，全部跪低」，仲話「你係一條軟皮蛇，你係狄志軟（遠）皮蛇」，由於食字食得應，在場有人發出歡呼聲；而時間剛滿，狄志遠冇得回應。
而曾獲黃毓民栽培、如今反目成仇嘅維園阿哥任亮憲，噚日為何志光站台，總結發言時更發功，話佢哋代表一班被黃毓民欺騙咗十年嘅苦主，斥黃毓民一直破壞民主運動，包括叫人唔好去六四集會、自願簽確認書等。唔知毓民喺其後選舉論壇會否還拖？該區其他參選名單，請參閱本報立會選戰網站 http://hk.apple.nextmedia.com/legco2016/region 。