有唔少內地品牌都好鍾意搵韓星做代言人，喺內地賣餅乾嘅嘉士利（1285），就曾經搵過韓國男團EXO前成員鹿晗做代言人，仲贊助埋網絡綜藝節目《你好，是鹿晗嗎》，仲話當時反應仲好唔錯㖭。
唔講唔知，嘉士利同鹿晗嘅合約原來已經完咗，公司董事局副主席譚朝均仲話，應該就唔會再贊助綜藝節目啦。咁搵邊個好？今屆巴西奧運造就咗背泳選手傅園慧成為網紅，問譚總會唔會諗吓，但佢好似對傅園慧無乜興趣，同華華講「都有考慮過奧運運動員嘅」。
傅園慧無興趣，譚總好似對女排有啲啲興趣咁，話佢哋今年喺奧運終於奪金，應該真係會「諗吓」嘅。佢仲話如果有合適人選，就會一簽就簽兩年，想代言人個靚樣擺喺包裝同推廣材料度，最好可以拍埋電視廣告㖭。
其實可以考慮吓教練朗平，放佢個樣喺包裝應該好爆。