訪港旅客近月跌勢收窄，在山頂經營山頂廣場嘅恒隆（101），亦準備好喺年底開始裝修及租戶重整工程。噚日同恒隆董事總經理陳南祿（Philip）坐低傾偈，佢就話受到Pokémon啟發，覺得山頂廣場要有獨特嘅元素，先可以吸引到新客嚟。
Philip講Pokémon成功係互動上，佢舉例，日本大阪或橫濱日清杯麵博物館，之所以吸引旅客源源不絕，在於有DIY自家製作杯麵，遊客可製作自己專屬獨一無二的杯麵，見過有旅客一打打帶走。至於山頂廣場可以點玩DIY，他就賣關子未有披露。
講到Pokémon遊戲，以為Philip只聞不玩，竟自爆亦有下載兼捉精靈，問到打到甚麼level，佢就笑而不語，仲話唔想「堅離地」，試吓玩先知這個世界發生甚麼事。恒隆傳訊助理董事關則輝就話玩到level 3，未捉到比卡超，而太子爺兼助理董事陳文博（Adriel）就話全力搞大連恒隆廣場，暫未有空閒試玩。