明知太嚴厲就會討人厭，但每每想同事再sharp一點。有要求，是因為知道他朝他們總要接棒升上來。
或者，這就是所謂人之患，在好為人師吧。甚至，許多人會認為這種想法最愚蠢，咪由得佢哋烚吓烚吓囉，咁先證明你是無可取替嘛。
唔，見人見智吧。講到底，佢fit先幫到部門嘅。
其中一樣令Mary叫苦的是，好多人身為公關，本應是溝通傳訊的專家，偏偏表達技巧拿揑得不好，不是期期艾艾，就是說話欠缺條理組織，每把太多不必要細節加入內容，越講對方越lost。主要訊息人哋收唔到，溝通咪失敗囉。Mary的建議是千萬不要讓知得多、了解得深反變成自己的負資產。
坊間有所謂elevator speech之說，即無論甚麼題目，也要濃縮到一程電梯的時間內講完。因為做唔到，對方的專注力就會遞減，而且對話過程往往會糾結在不必要的細節上，討論沒完沒了，反而失去取得大方向共識的機會。
這世界自有樹上雀仔也可𠱁落地的super salesman，但Mary的觀察是有此天賦的人多數已加入廣告或市務行業，不會揀專門揼石仔的公關角色。但冇人咁叻，將勤補拙總可以吧？人家出口成章，句句啱聽入耳，你咪迫自己對手上工作，永遠用不超過三、四句的扼要進度簡介囉，呢三、四句真係要雞精feel，字字珠璣，唔使驚唔夠，因為想知多點，對方自會追問。反正你熟，何用怕呢？反而問極有貨，成個溝通過程才會有交流、有滿足感。
年輕時就有高人教過，既然唔係成日有機會見老細，喺電梯遇上又多數都係問你最近忙緊乜，你梗係袋定一兩句佢最like嘅答案啦，唔通真係喺電梯度數晒啲job嘅進度咩？
彭瑪莉
mailto:[email protected]