中環友人趁住一帶一路熱潮，話要搞一個緬甸訪問團，到仰光及主要經濟地區一遊，幾位朋友聽到，都話如果夾到時間，一於加入「旅遊視察團」去仰光行吓。
左丁山嗰代，英文中學課程都幾英國式，記得唔知中一或中二時，讀地理就會讀到印度緬甸地理，淨係要記住啲地區及城市英文名稱，已經苦不堪言，但因此知道緬甸在1950年代係魚米之鄉，甚為發達，經濟文化領先泰國及中南半島諸國，仰光大學係亞洲著名大學，與馬來亞大學、新加坡大學及香港大學係英國殖民地嘅四大名校。點知1948年獨立後軍人慢慢掌權，1962年尼溫將軍（Ne Win）索性發動政變，緬甸變成軍事獨裁體制，行鎖國社會主義，於是由富變貧，要過足54年先至再有民選政府出現，但緬甸已變成亞洲窮國，遠遠落後於泰國，遑論新加坡。軍事獨裁加社會主義，顯然係步向衰亡嘅秘方。
好嘞，昂山素姬成為緬甸領導人之前，軍政府已經知衰，慢慢開放緬甸，引入外資，到目前為止還是甘心乖乖地交出政權，希望唔好第二日又步泰國後塵從民主回歸軍政啦。前星期碰到一位四歲自緬甸來港嘅華僑，佢話在港長大畢業之後，近年親戚不斷叫佢返仰光發展，重振家業，於是現在幾乎有一半時間住在仰光。問佢緬甸是否30幾年前深圳嘅模樣呀？佢話冇咁落後，大概相差二十年啦，但緬甸有後行者優勢，引入歐洲電訊集團，一下子幾年間全國已有八成人用手機，通訊發展直情係大躍進，過往離開往外地嘅緬甸人及緬甸華僑亦紛紛回國投資，故此經濟發展勢頭好好，日本人尤其積極進軍緬甸。咁中國人呢？呢位朋友話：「中國策略有少少偏差，一味靠國家勢力，大型基建項目，啲國企做完賺完就走，冇乜根基留低，緬甸有基建之益，但當地人頗有微言，日本人就靠私人企業到當地，增聘工人，拉攏當地關係反為更受歡迎。」咁香港有乜角色呀？緬甸朋友話：「香港最多，做得最好嘅就係中小企，緬甸好需要建立中小企經濟體系，有興趣者可到仰光探吓水溫先。還有一樣，緬甸總結泰國與中國近30年發展經驗後：知道不能犧牲環境生態嚟促進GDP增長，已有不少歐美國家顧問去獻計推動可持續發展，大家唔好諗住去緬甸燒森林，挖深山，取木拓地掘玉石呀，呢條橋唔受歡迎嘅嘞，當然更唔好將污染性工業搬過去！」