熱愛足球嘅新東參選人社民連梁國雄，上庭遇到波友。佢噚日同快必譚得志去東區法院，就舊年喺星島集團舉辦嘅全港校際辯論比賽期間，舉黃傘同用大聲公嗌口號示威阻礙活動人士單案出席預審。主審裁判官覃有方一開庭就「利申」，話幾年前代表大律師公會同議員隊嘅長毛喺足球賽較技，循例問長毛有冇反對佢審呢單案？長毛爽快咁話冇。
裁判官又指，既然控方傳召活動嘉賓石永泰資深大律師作供，點解唔傳當日有出席嘅林鄭月娥？控方話冇需要證明全部參與者受到騷擾，總之唔會傳召。
冇律師代表嘅快必就話控方唔傳佢傳，聲稱有星島職員指控佢當晚影響到林鄭做唔到某啲行為喎；裁判官就叫佢問吓律師先，仲話可能到時職員上到庭會話自己亂噏呢。該區其他參選名單，請參閱本報立會選戰網站 http://hk.apple.nextmedia.com/legco2016/region 。