黃心穎出身於小康之家，佢哋爸爸黃沛霖係位中醫，行醫多年，心穎4姊妹生活無憂，到1995年舉家移民加拿大，到早年先至陸續返香港發展。不過，心穎同心美都係慳妹，心穎更多次被拍到去平民商場行街shopping，而心美喺3年前已經識得買磚頭做業主豪花過千萬喺九龍東買入一個實用面積近800呎嘅單位連車位自用，好有投資眼光。
至於圈中其實仲有唔少慳妹﹐近期嘅例子有：
石天欣
喺大台飾演「被強姦受害人」嘅石天欣，啱啱喺上個月於美國嫁畀圈外男友Jacob，婚禮當日着嗰件白色通花lace襯肉色婚紗，只係值港幣100蚊，成個婚禮埋單唔使1,000蚊，佢話寧願留番啲錢去玩去食。
關詠荷
貴為影帝家輝嘅太太、亦係當年花旦之一嘅關詠荷，婚後未改其慳家性格，舊年曾經被本報撞到佢攞啲舊衫去改到啱身嚟着，真係好知慳識儉。
鍾嘉欣
準媽咪鍾嘉欣亦係慳妹一名，曾經自爆多年來只靠客戶贊助服裝，出入又愛坐交通工具，頂多都係坐的士，佢喺香港同溫哥華各有兩個物業，係圈中出名嘅小富婆。
楊思琦
單親媽咪楊思琦係圈中數一數二嘅慳妹，佢不單狂接job養家，平日慳慳埋埋，加埋登台收入，就攞晒嚟買磚頭保值，大約持有至少3個千萬單位。
謝安琪
早排宣佈停工嘅謝安琪亦係慳家之人，佢前年就用慳慳埋埋嘅錢，喺大埔中心置業又可以畀屋企人住或者收租。