銀娛（027）主席呂志和，噚日去完自己間嘉華國際（173）業績會之後，急急腳咁走。原來佢約咗永利澳門（1128）主席史提芬永利，趕住去澳門出席對家永利皇宮開幕禮。呂志和笑笑口話，同史提芬永利識咗好耐吓，「無論如何都會過去同永利揸吓手走人」。
其實同行唔一定係敵國，史提芬永利對住其他行家，不嬲都唔會多口，之前都話開幕禮會請埋其他行家過嚟，睇吓永利皇宮噴泉表演。同行家聯誼之餘，可能乘機示威啦。不過，史提芬永利唔似得金沙中國（1928）主席艾德森咁，成日寸同行啲嘢唔多掂。特別係同呂志和好唔啱牙，舊年仲因為過咗火位，搞到要寄封道歉信畀呂志和。嚟緊又到金沙間巴黎人開幕喇，唔知艾德森會唔會請呂志和去睇開幕禮呢？