某茶餐廳熟客，自稱去年區會投票日，中午時段已經估到癡根墮馬的結局，因此晚飯提早熱烈地彈琴開晒啤酒慶祝。
今次立會選情迷離，熟客點睇？他捋鬚作狀沉思，說一定會有癡根第二，做場建制墮落的催淚戲，轉移選民視線，舒緩選民憤慨。這樣哦，邊個係這個墮馬翻版？花生友陰陰笑，我五隻手指數：a，選舉前必然降班的乜博士？b，那個自己哪家大學畢業都要「遲些話你知」？c，唔知乜丁丁的鄉下佬？d，修圖到阿媽都唔認得的大媽？e，西環契爺極有機會被雙規那個契仔？
熟客剝住花生賣關子，但見他合指一算，暗示選舉日警力預先張揚升格，說明大龍鳳戲碼九成會出台。我問，是地鐵打架嗎？「點止咁簡單！」梁狼肯定配合搞大，把選舉主任擺上枱，個個被O記貼身保護下，票站仍然會中磚，票箱會失蹤，廢票周街丟兼自燃……一籃子紛擾，入晒港獨數。我問他到時投給誰，「我會回答票站調查員：我唔係選民。」咁你入票站做乜？「狗仔隊追住我這個票神，我入去避風頭。」喔，熟客原來少條筋！咦，睇落佢幾面善，莫非……