港大民意研究計劃最近受傳媒委託，就立會選舉進行滾動民調，訪問方式卻惹批評。
由於佢哋只讀出各區參選名單首位、冇讀排第二嘅名，有政黨包括社民連同自由黨都話受訪者唔知名單有星級抬轎，或影響受訪者係咪支持嗰張名單？而結果嘅偏差，或造成棄保效應，促民研講埋排第二嘅名喎。民研總監鍾庭耀噚日發表中期報告，強調喺有限樣本下，科學檢測未顯示讀一人、或讀兩人，對調查結果有明顯不同，但話明會視乎各界對報告嘅反應再決定係咪調整。
以為鍾庭耀派檸檬？同樣有份贊助民調嘅民主動力趙家賢晚上報喜，話港大回覆會喺噚晚開始，讀出名單首兩位候選人個名，供受訪市民選擇。民主動力歡迎並感謝相關更改。唔知之後嘅民調結果，係咪會有好大變化？