大家相唔相信奇蹟？喺體育、演藝、文化及出版界參選嘅音樂創作人周博賢似乎都信嘅，否則點會披甲撼高牆，出戰建制鐵票護身嘅馬逢國？口講無憑，樂壇長毛仲唱埋出嚟，佢一手包辦曲、詞、編曲、監製兼主唱競選歌曲《奇跡》，同時搵嚟界別代表拍MV，包括男神王宗堯。周博賢話為咗呢個MV碌爆人情卡，八方相信撐佢參選嘅人，冇預佢要還！
數月前創作《奇跡》
周博賢喺fb上載MV，梗係獲網民爆like，好認同各界嘅心聲。演藝界男神王宗堯話，「希望可以揀到一個代表到我哋嘅人入立法會，為我哋發聲」；身兼文化評論人嘅灣仔區議員楊雪盈就指，「我希望就算呢場係一場逆境波，我哋都會打得好好」。體育界都有嘢想講，「無家者世界盃」香港足球代表隊教練溫遠雄就話，相信足球同社會都會越嚟越好，「因為同樣地都有好多有心人喺度幫緊呢件事」。
八方問過周博賢，佢話幾個月前已經創作咗《奇跡》，因為覺得呢次參選真係要靠奇蹟先可以勝出，而無論今次有冇奇蹟，都係一次難忘經歷，因為接觸到好多界別人士，清楚了解社會現時實況。
睇番首歌嘅歌詞，都係表明逆境作戰，形容參選「像巨獸與小子的比拼」，質疑「這一役怎取勝」，惟有「抗拒去認命」，「相信奇跡撼碎牆壁」。難怪佢自己都喺fb話，即使只有1％勝算，都要奮戰，希望大家「和我繼續儍」。
李八方
mailto:[email protected]