有線電線噚晚舉行立法會港島區選舉論壇，但兩個惹火人物繼續無影，一個係冇得排頭位仲要幫黨友張國鈞「抬轎」嘅民建聯鍾樹根，企鵝男話派咗樹根去做更緊要嘅事喎。
另一個係新民黨葉劉淑儀，佢之前缺席論壇，由名單上兩位大肚婆陳家珮同王政芝頂上，遭對手圍攻漠視婦女權益。點知佢噚晚繼續冇影，但今次事先做好「風險管理」，喺fb稱自己入咗院。
上次稱因病缺席論壇嘅葉劉話，8月初起病咗3星期，食抗生素、類固醇都唔好，噚日覆診醫生叫佢照肺喎，又話佢持續發燒，建議入院休息，佢自言聽到醫生咁講有啲激動，好擔心影響選舉工作，但又力陳自己一星期拉足七日票好辛苦。有啲選民或者擔心，身體孱弱嘅議員，未必應付到議會工作喎？唔知葉劉驚唔驚走票？該區其他參選名單，請參閱本報立會選戰網站 http://hk.apple.nextmedia.com/legco2016/region 。