持槍行劫呢啲突發事，普通人百年難得一見，但喺外國生活過嘅民政事務局局長政治助理徐英偉Caspar就喺銀行任職時遇過幾次，唔知係咪見過大蛇屙尿，因此訓練到淡淡定、有錢剩？
任職小鎮銀行 做埋拖地
今年40歲嘅Caspar係2008年首批獲任嘅政治助理；由煲呔年代過渡至梁班子，侍奉過曾德成同劉江華兩局長。佢加入政府前宣佈放棄加拿大國籍，皆因佢小六已經舉家移民加拿大嘞。
Caspar話移民初期冇乜唔慣，相反識到新朋友不知幾開心。原來佢係獨仔，咁多咗朋友梗係happy。佢憶述加國讀書時都會去唐人街蒲，「會去嗰度唱卡拉ok」。至於讀書，佢自稱掹車邊，「都係啱啱過到骨嗰隻」；讀大學時則創立過香港同學會，仲做會長搞過唔少活動。
喺加拿大渥太華大學主修經濟、公共政策及公共行政管理嘅佢，畢業後第一份工係喺小鎮銀行做嘢，當時由低做起，「客人瀨屎瀨尿都係由我拖地㗎」。呢份工仲有奇遇，幾次遇上匪徒持槍打劫，「唔係碎料㗎，係揸長槍衝入嚟，但次次都唔係我個counter，險過剃頭但好彩冇事」。歷經劫難，佢份人都大膽咗，「試問仲有乜大場面未見過？」難怪回流後竟敢走入特區熱廚房。
