【本報訊】在網上，有這樣一輯照片：87歲白髮嫲嫲，與孫女穿上相同潮服，變身跨世代雙妹嘜！父母離異，馬曼莉與一手湊大她的嫲嫲失聯5年，17歲那年遇刀傷意外，休養期間萌生找回嫲嫲的念頭。重逢10年，媽媽離世，嫲嫲成了最親的人，「嫲嫲年紀大，趁仍然健康，好想留低特別嘅回憶」。小時候打過羽毛球的小公園、熟悉的街角、好玩的造型，藉光影留住溫度，只記今朝。
記者：呂麗嬋
「影完將輯相放上facebook，冇諗過咁大迴響，好多人留言，但其實未影之前擔心到不得了，嫲嫲平時好唔鍾意影相，唔係偷影就係逼佢影，想搵張合照都好難」。馬曼莉（Mary）在澳門長大，卻與香港有淵源，男友是香港人，總兩地走；做時裝精品銷售，參加歌唱比賽，客串做模特兒，從事各類創作。這天剛下船，小妮子即趕來影樓，談她的嫲孫時尚影集，還有與嫲嫲的感情。
澳門街拍 回味小時候
「細個同嫲嫲一齊生活，直至12歲嗰年父母分開，先冇一齊」。那一年爸爸因婚外情鬧離婚，媽媽帶着她與哥哥離開，自此與最疼錫她的祖母再無見面。「細個同嫲嫲瞓，經常發噩夢，每次驚醒都係嫲嫲陪住我；佢又唔畀我食剩嘢，每次都𠱁我：最後一啖，美人照鏡！」都是零碎的生活點滴，Mary說，出世時祖母已是60開外的老人，但在她心中卻永遠是個幹練的強人，能頂起半邊天。
「嫲嫲唔係一般老人家，會沖凍水涼，鍾意食凍嘢，行得好快，你永遠要跟住佢後面跑；最厲害係70歲仲做到一字馬，我記得嗰時唔知咩社區表演，佢壓軸表演一字馬，個個拍爛手掌」。對嫲嫲的過去，盡是零碎湊合，只知祖母曾務農，很捱得苦，就像無數上一代人，走難時伯父叔父分散住在廣州和香港，祖母就隨父親落腳澳門。Mary說，在她出世時祖母已與祖父分開，長年茹素，在佛堂生活。
對祖母的過去，她直言不了解，但小時候與她簡單而甜蜜的回憶，卻常繫心頭。「父母離婚後，一直好想知道嫲嫲嘅近況，但嗰時得12歲，唔敢開口問」。失聯5年，直至17歲那年，祖母終於在她生命再次出現。那一年，她在學校遇上意外，兩個男同學在班房玩挾持遊戲，在旁的她誤中副車，左臉血流如注，縫了12針，「因為呢次意外，做咗學校嘅明星，新聞都有報道，留喺屋企休養，成日諗起嫲嫲，好想見番佢」。可幸澳門很細，要找一個人，一點也不難。
「𠵱家唔係一齊生活，但一星期至少會見一次面，飲吓茶食吓飯」，平凡但可貴。重遇10年，媽媽離世，面上的刀疤逐漸痊癒，嫲嫲成了最親的人，「嫲嫲年紀大，趁行得走得，好想留下特別嘅回憶」。與朋友商量，分工合作，決定拍一輯好玩又與別不同的家庭照。小時候打過羽毛球的小公園、熟悉的街角，藉光影重拾美好的時光，「細個係嫲嫲拖住我隻手，我要岳高頭望佢，𠵱家到我拖佢隻手，帶佢周圍去」。
好玩童心感動攝影師
一輯相，由服裝、化妝、造型到拍攝，5個朋友湊合的拍攝團隊，街頭巷尾影足12小時。負責拍攝的李盈（Kel Li）說深受嫲孫倆感動，形容跳出家庭照的框框，好玩又動人。坐在一旁的Mary說：「影相時我哋有一句魔咒，只要你話『你同你個孫女好似樣喎』，嫲嫲就會笑到見牙唔見眼，乖乖聽你話擺pose。」嫲孫倆走在街上，感嘆小城發展，街道失去本來面貌，可幸有些感情從未變。
「嫲嫲年紀大，好擔心拍街景要走嚟走去會好攰，點知佢影到後期着晒火，你問佢攰唔攰，佢話你未捱過，先會覺得攰」。都說人老了，就會變回小孩。Mary說，這刻才發現，每個人其實心底都有顆好玩童心，有待引爆。架起黑超、穿上紅裙，還有恍如時尚雜誌的造型和動作，兩嫲孫相距60歲，卻合拍如雙妹嘜。「朋友話你嫲嫲好有型，仲型過你，輸俾自己嫲嫲，心服口服」，孫女如是說。
