餐廳有女侍應不算新鮮，但若「她」是個機械人，又會否引起你的興趣？旺角某間茶餐廳近日引入兩部「識行識講嘢」的機械女侍應，負責在餐廳內遊走送餐，當有人在它面前經過時，更會出聲提示叫人「請借過一吓」。不過由於它們行動緩慢，更只能把食品送到枱邊，有網民指直「到咗張枱要自己起身去拎！不如索性出去水吧等！」
茶餐廳近日從內地引入兩部機械女侍應，一部負責在門口迎賓及展示當日供應的餐單，另一部則在餐廳內傳菜。老闆陳志明接受電視台訪問時稱，原本打算借機械人來減省人手開支，員工起初都介意會「無得撈」，不過後來發現機械人做到的工作有限，最終只成為吸引顧客光顧的綽頭，餐廳近日的客量亦大增15%。
陳志明又稱，由於機械人只能按著地下指定路線行走，暫時不能送遞熱飲、餐湯等熱食，「因為佢仲係試驗階段，轉彎可能有啲拋嘅問題。」
據稱該款機械人每部索價9萬元，在內地淘寶網亦有廠家出售，聲稱會提供「一年質保、終身維護」。有網民就大踩機械人「木口木面，美感不足」，更擔心中國製造的質素，「如果地上有積水，佢行過會否爆炸㗎？」有人更指餐廳應將購買機械人的開支分給員工，「等員工開心吓，反而會落力幫你做！」不過有網民就讚餐廳有創意，認為機械人的價值在於「機械和關公的crossover」。
【網民咁講】
Fish Yu：講真，佢行一轉嘅時間已經夠我行10轉。
Isabelo Cheng：行得嚟杯冰溶咗一半。
Chung Yat：我唔想食餐飯都驚佢爆炸。
Neville Lee：不如整條回轉壽司帶送餐好過啦。
Victor Leung：肯投資都係值得欣賞嘅。
Lai Ka Lung：放心，好快會消失，我講間舖頭！
Siu Pong Wong：將呢舊嘢嘅錢分畀員工，等員工開心吓，反而會落力幫你做！