遇到最惡劣嘅逆境都要捱過去，法國跑手迪尼斯就向大家展示咩嘢係奧運精神。上周五里奧男子50公里競走，迪尼斯跑跑吓肚痛，頂唔住缺埋堤，之後仲一度暈低，但一褲都係又如何？佢堅持完成賽事，最終都有個第八名。
連續三屆奧運都出事
迪尼斯來頭一啲都唔嘢少，佢喺兩年前歐錦賽刷新過呢個項目嘅世界紀錄，但喺奧運就似乎一直都運氣麻麻。2008年京奧佢跑咗一半就因為胃痛，頂唔住要退賽；四年後倫奧仲慘，衝咗線先話佢喺非指定地方拎水飲，被判取消資格。到今次里奧，迪尼斯開賽跑咗大約45分鐘，領先緊嗰陣開始覺得個肚唔多妥，頂唔順行住排泄咗，之後再突然暈低埋。
上天次次都喺奧運整蠱迪尼斯，但佢今次就撐住，堅持落去，頂硬上完成埋餘下嘅比賽；雖然最後贏唔到獎牌，但至少都喺奧運正式完成一次比賽，贏番掌聲。
50公里競走最後由斯洛伐克嘅托特贏得冠軍，至於第三名、日本嘅荒井廣宙，原本因為同對手爭位有身體碰撞而被取消資格，但上訴後又得直喎，拎番面銅牌。