雖然韓式雪糕已興了一排，但大大舊棉花糖搭上雪糕，依然吸引到唔少人呃like。這間韓式雪糕新店L'attitude x Ruimlk將於今個星期開幕，除了主打這些「呃like必備」雪糕，仲有咖啡、奶昔、沙冰，以及自家製的冷壓果汁。
烏卒卒烏雲雪糕
唔講唔知，原來烏雲軟雪糕的烏卒卒來自墨魚汁。整棉花糖的糖以墨魚汁染色，造出烏雲效果，故入口時帶有少許墨魚汁的味道，但唔算太奇怪。至於下面的牛奶雪糕，奶味濃厚，混和一小撮爆炸糖，滋滋作響，感覺挺好玩。不過，大大舊棉花糖搭雪糕，口味略為偏甜，而且份量幾大，兩至三人食就剛剛好。
會甩的蓬蓬裙
至於另一呃like必備的粉紅蓬蓬裙，以雪糕脆筒裝住，裏面為朱古力加牛奶味的扭紋雪糕。草莓棉花糖圍繞雪糕筒，配上草莓乾和草莓粉，吃下去酸酸甜甜，幾清新。唯獨雪糕的設計，令食客食時不太方便。尤其當脆筒上的雪糕開始溶化，就會慢慢流向棉花糖，加重裙的負擔，變相很易甩裙，場面「尷尬」。
若不太好棉花糖，想淨嘆雪糕，可以試試味道有點似波子汽水的夏威夷海灘。淋於雪糕表面的藍柑醬帶少少酸，剛好中和了雪糕的濃厚牛奶味。
L'attitude x Ruimilk
尖沙咀金馬倫道 19A
記者：湯珮然
攝影：劉永發
