近期大熱嘅Pokémon GO搞到人人日捉夜捉，相信都令大家感受到AR（Augmented Reality，擴增實境）威力有幾勁，大家又有冇諗過，AR技術除咗可以用嚟捉精靈，仲可帶大家返到150年前嘅中環匯豐總部？
噚日獅子行就出咗個流動應用程式「匯豐：香港的足跡」，就正正採用咗AR。據匯豐介紹，佢哋係上年開始研發呢個app，畀大家喺中環匯豐總行地下，透過手機或平板電腦，經歷一個穿越時空嘅虛擬旅程，感受同見證匯豐同中環嘅歷史變遷。
個旅程總共有5個展覽，包括「五穀之首」的稻米雕像、花崗岩獅頭石像、石刻中環歷史街道圖，仲有係人都識嘅一對銅獅子史提芬同施迪，等緊你哋「捕捉」。
重現舊總行大廈
八方親身試咗5個互動展覽，覺得石刻中環歷史街道圖最盞鬼，其餘幾個都係睇歷史相同短片，感覺上有少少悶。喺歷史街道圖度掃描咗個標記之後，就可以見到中環喺4個唔同時期嘅歷史街道圖，仲可以圍住個3D版匯豐總行大廈行，由唔同角度去睇唔同年代嘅中環，仲見到海皮發展同電車郁郁吓㖭。
查實匯豐唔係第一次推出同AR有關嘅嘢，上年匯豐150周年賣嘅紀念鈔都已經用過呢種科技，只要用「匯豐150」呢個app再掃描張鈔票，就可以睇到匯豐喺十九世紀落戶香港後，香港人生活轉變嘅影像，都幾好玩㗎。
李八方
mailto:[email protected]