公民黨黨魁梁家傑退下火線，交棒畀飛機師譚文豪，噚日佢兩個就拍住去黃大仙大成街街市派單張，點知中途遇到九西經民聯梁美芬嘅朋友：老鼠（圖）！飛機師冇有怕，一邊解釋鼠患來源、一邊話畀大家聽佢已經同食環跟進緊。譚文豪話，鼠患嚴重實情同街市附近嘅渠道有關，佢已經同食環嘅防治鼠患組跟進，希望遲吓再做好啲洗地、落藥、放老鼠籠嘅工作可以有所改善。
話時話，估唔到飛機師同大律師落到街市都好受歡迎，傑哥話佢由2004年入立法會開始就關注街市問題，近年已經由譚文豪繼續跟，講到街市裝冷氣、壞𨋢等問題嗰陣，譚文豪都講得頭頭是道，話佢當選的話，入到議會都會繼續跟。該區其他參選名單，請參閱本報立會選戰網站 http://hk.apple.nextmedia.com/legco2016/region 。