拉咗3年布嘅創科局舊年正式成立，但大半年嚟似乎仲未有乜政績出嚟。噚日真係見過Steve Jobs嘅創科局局長楊偉雄出席電腦節開幕，但偏偏致辭冇佢份，仲要喺人哋講緊嘢嘅時候公然「釣魚」。
八方留意到主禮嘉賓工聯會榮譽會長鄭耀棠致辭嘅時候，坐喺台上嘅楊偉雄忽然耷低個頭，合埋隻眼唔郁足足30秒，唔通噚晚通宵睇奧運冇瞓到？查實當時棠哥分享緊佢早排玩VR嘅經歷，講到又去水龍宮又去珠穆朗瑪峯，又確真係幾悶嘅。但更離奇嘅係，開幕禮去到一半，楊偉雄就因為有事做要趕住走人，連大合照都唔影，認真係貴人事忙，連佢工作有關嘅活動都冇時間坐足全場。