英超開鑼，雖然香港直播權已由中資樂視高價奪得，但now係主要播放平台，左丁山仍然可以收睇。令人失望一啲嘅就係前三季now有獨家轉播權，幾好心機去做，球迷在星期日一早起身，八點鐘可以睇番星期六嘅六至七場賽事精華，因剪接緊湊，將一場悶波濃縮為三四分鐘入球精華片段，都變成好睇。上星期六幾場波冇乜睇頭，諗住星期日早上睇番精華剪輯就算，點知早上時間竟然係重播曼城對新特蘭全場，冇咗賽事精華專輯，now就慳水慳力啦，身為標準球迷，左丁山就覺得冇癮，熄機抗議。
第一個星期賽事不足以論英雄，但所謂Big6（六大球會），即是曼聯、曼城、利物浦、阿仙奴、熱刺與車路士已經係表現得零零舍舍高些少，上季爆大冷嘅英超冠軍李斯特城怕幾難再偷雞咯。李斯特城嘅絕招係穩守突擊，後防嚴密，中場鬥搶，前鋒夠快，但今季中場悍將干提轉會車路士，中場失去一半動力，而其他弱隊如侯城就以其人之道，還於其人之身，第一場就用李斯特城戰術取勝，相信其他中下游隊伍亦會用同樣辦法對付李斯特城，令呢支上屆冠軍冇啖好食。
今季除咗睇球星，還可以睇領隊明星，世界最高薪嘅足球領隊雲集英超，計有曼聯摩連奴（葡萄牙人）、曼城哥迪奧拿（西班牙人）、利物浦高洛普（德國人）、阿仙奴雲格（法國人）、車路士干迪（意大利人）、熱刺普捷天奴（阿根廷人），以至二線球隊中之強隊李斯特城雲尼亞里（意大利人），愛華頓朗奴哥文（荷蘭人）都是有名氣之輩，摩連奴、哥迪奧拿、高洛普、干迪四人更加大賽事戰績彪炳，也只有英超球會的雄厚財力，才可以把這批「偉大領隊」一網打盡，收歸旗下。我哋球迷熱切期待呢幾位名帥各師各法，使出渾身解數，排出不同陣式與戰術來爭奪冠軍。從第一周賽事睇，利物浦與車路士都以快速行軍全場緊逼對方戰術，搶奪先機，曼城則以控球在腳，短傳推進為主，第一場贏新特蘭二比一，未見真正威力，跟住在歐聯外圍賽大勝布加勒斯特星隊五比○，就見到攻力厲害，曼聯以天價買入中場普巴，前鋒伊巴謙莫域，貨必對辦，今季肯定可以爭前三名。英超憑電視轉播費稱霸世界球壇，球星雲集之餘，領隊亦是天王級數，係最全球化的聯賽。但英國脫歐成為事實之後，限於移民法例，歐盟籍的領隊和球員是否可以自由留在英國，係英超的一大隱憂。