睇奧運，未必係金牌戰先係最好睇，有時爭銅牌仲精采！周三中國贏埋乒乓波男團金牌盡擸四金，但就俾德國搶咗少少風頭。事關德國名將、35歲嘅波爾喺銅牌戰第三場雙打嗰陣，打打吓因頸骨移位，要打止痛針先可以繼續比賽；但波叔冇因為咁而受影響，仲幫德國贏埋雙打同埋之後場單打，以總比數3:1反勝南韓攞到銅牌。
中國三連冠盡擸四金
周三場乒球男團決賽，由馬龍、張繼科同許昕組成嘅中國，以3:1贏日本實現三連冠美夢，仲擸晒里奧四面乒球金牌，主教練劉國梁仲開心到錫咗張繼科個額頭。講真，中國贏就預咗，所以呢場金牌戰唔夠德國對南韓場銅牌戰咁精采囉。
頭兩場單打南韓同德國各贏一場，打成1:1平手，去到第三場雙打，德國派出五朝元老波叔夥拍施泰格，硬撼南韓嘅鄭榮植同埋李尚洙。打到2:2嘅時候，波叔因為頸痛而要求暫停比賽，經檢查後原來係頸骨移位，但佢認真厲害，打完止痛針就繼續砌，仲幫德國贏11:9，以3:2贏埋雙打。
不老波叔想再戰東京
去到最尾一場單打，波叔直落三盤11:8、11:9同埋11:6贏朱世赫，最終幫德國以總比數3:1勝出，同時拎到佢歷來第三面奧運獎牌。喺對上幾個月條頸痛過四、五次嘅波叔賽後話：「初時我真係以為會玩完，因為真係好痛。特別係防守嗰陣，要用好多力同接好多上旋波。好彩我夠冷靜，結果就可以繼續打。」南韓球手朱世赫亦大讚波叔好堅：「波爾發揮好穩定。呢場波我喺防守方面做得唔夠好，結果俾佢贏咗。」雖然波叔年紀唔細，不過據聞未有掛拍嘅打算，仲話想參加四年後嘅東京奧運。
至於中國，周三原來係佢哋主教練劉國梁嘅結婚10周年紀念。佢話：「我一直想用呢面團體金牌作為紀念禮物，家陣我可以好開心咁同太太、囡囡去度假。」劉國梁仲話男團雙子星馬龍同埋張繼科，或者會玩埋東京奧運。