62歲嘅光大集團董事長唐雙寧好有幽默感，佢噚日出席光大證券（6178）上市儀式，笑言自己係坐「深港通」部車來港，佢又作詩畫畫送畀港交所（388），難怪港交所行政總裁李小加都現身撐場。
中國傳統藝術乃「詩書畫印」，唐雙寧書畫了得，擅寫草書，詩亦難唔到佢。噚日佢就露兩手，致辭時吟出自己所作嘅詩：「香江舉目，八月十八曾幾度？卅載加三，放眼今朝處處歡。鑼聲平地，多少圓缺都忘記。一盞同乾，待到他年上九天。」
呢首詩，主要寫出光大對香港嘅感情，講33年前，光大集團在港成立，噚日係8月18日，而每次光大旗下公司在港上市，唐雙寧都會去港交所打鑼。最後一句，唐雙寧就係希望乾杯之後，光大有更大發展。
此外，佢亦作畫送畀港交所，佢畫咗一隻牛，希望「深港通開通後，股市就牛了」。