老董愛將、團結香港基金總幹事鄭李錦芬，噚日喺記者會介紹9月24日至10月1日喺會展舉行嘅「創科博覽」時，以「全球大學校長中的超級巨星」形容活動顧問團召集人徐立之（圖），估計展覽每日有8,000人入場，創科局、教育局、中聯辦教科部、中國國家科技部都有份支持，話明大部份展品都係中國產品，「係國家最頂尖科技嘅成就」。
獲笠高帽嘅徐立之，噚日記招上全程使用美國產品、玫瑰金MacBook Air，謙稱自己只係「過氣科學家」，已經好耐冇喺實驗室做實驗，但當然過去嘅科技訓練仍喺腦中。徐立之發言期間一度窒咗，然後道歉：「對唔住，我瞓咗覺」，又話中國發射嘅量子實驗衞星，「我都唔清楚，不過好快嘅」！