韋斯咸今季轉去奧運球場做主場，但風水唔多好喎。今夏大嗱嗱使咗2,050萬鎊（約2.1億港元）買返嚟嘅阿休踢咗35分鐘就傷咗，最慘嘅係傷勢嚴重，唞成四個月，話唔定下年先復出。
槌仔最貴收購明年見
今季搬去有八萬座位嘅奧運球場，韋咸雄心壯志，打算創一番成績，所以簽咗唔少人㗎，包括以破球會紀錄嘅2,050萬鎊由史雲斯買咗阿休。呢位加納前鋒喺禮拜一首場聯賽都有上陣，但踢咗35分鐘就受傷退下火線。起初領隊比歷認為阿休傷勢唔算太重，養傷三個星期就搞掂。不過，經檢查後發現大鑊嘞！
阿休大腿傷到好重，主席大衛蘇利雲個仔積克蘇利雲都忍唔住喺twitter公佈呢個壞消息，話阿休要接受手術，養傷四個月，最快12月底先復出，睇嚟下年先見到佢。韋咸嘅隊醫阿頭雲達布基就唔敢講阿休幾時復出：「佢呢次傷勢都幾嚴重，我哋唔會咁快下定論，諮詢最頂尖嘅專家先。家陣太難講佢幾時復出，但肯定要面對一次關鍵嘅康復過程。」韋咸都幾黑仔，正選左閘艾朗加斯威爾已經要唞三個月，而另一名新兵菲侯利亦受微傷困擾。
沙迪奧文尼操練傷肩
喺黑仔程度方面，利物浦亦不遑多讓，買嚟同米洛列特競爭吓嘅德國靚仔門將卡利奧斯手部受傷，估計過多兩個月先出得；而喺首場聯賽踢得唔錯嘅沙迪奧文尼周三喺操練時膊頭受傷，要入院檢查。據報文尼冇傷到骨，只係肌肉拉傷少少。另一支新兵變傷兵嘅球隊就係曼城，或者正確咁講，曼城係買咗啲受傷嘅新兵。德國中場根度簡成日話要八月復出，但睇個勢都要下個月先出得，而利萊辛尼同樣受傷患困擾。
