巴塞隆拿輕輕鬆鬆就拎咗今季第一個盃，佢哋周三喺西超盃次回合，主場3:0大勝西維爾，兩回合炒對手5:0，贏得球會史上第12座西超盃冠軍。
巴塞首回合贏緊2:0，呢場真係睇住嚟食，蘇亞雷斯、碧基同拿傑迪錫都做後備，仲試吓用阿達杜倫打前鋒，效果唔錯。呢位土耳其球員喺10分鐘接應美斯傳送開紀錄，之後喺46分鐘再整多粒，而美斯就喺55分鐘埋齋，以3:0贏咗西維爾。因為恩尼斯達傷咗唔喺度，所以呢次由美斯以隊長身份捧盃。
雖然講到巴塞狂風掃落葉咁，但其實都有隱憂，中堅馬斯真蘭奴喺末段拉傷大腿肌肉離場，賽後證實要養傷一周，肯定錯過西甲首戰對貝迪斯。由於馬菲奧同樣養傷，家陣巴塞得番兩個中堅用，就係碧基同埋新加盟嘅烏姆迪迪。教練安歷基賽後除咗例牌讚吓美斯同入波嘅阿達杜倫外，仲對烏姆迪迪好有信心，話呢位22歲嘅法國守將已經好快適應咗新環境。