踏入8月樓市又轉了勢，業主獅子開大口，這也是人之常情。過去一年俾買家狂砌，落價嗌三成，當然不是個個肯受坤，結果搞到業主索性唔賣。等了半年個市好轉後，你估班買家會否如市場般追價？一定唔會囉。
買賣是由雙方議決造成，若有一邊不願減價、另一邊也可以不肯追價，天公地道，位位專家又轉軚唱好，閣下估會買到市價嘢咩？一定唔會囉。
有人問，老樓點解可以喺月前話個勢已經跌到差不多，究竟睇到乜指標？現在可以同大家講，當兩個上車樂園，包括天水圍嘉湖山莊和沙田第一城不再尋底時，便是樓市回穩的時候。
那時兩個屋苑分別落到兩房僅280萬元和330萬元，已經好似被點穴咁打橫行，5月至6月兩個月內企得好硬淨，再無其他新低成交出現。即使當銀主貨出一間、賣一間，買家亦知道呢次平價潮好短癮，收購者全部為投資者。正所謂春江水暖鴨先知，年初西半山樓王天匯單位拍賣時，已見到爭購場面，大埔銀主盤墳墓比華利山別墅，又是出一間賣一間，樓市再要大跌？一定唔會囉。
再過多半個月，當二手業主叫價太狼死，買家見到新盤又不是全部賣得到，尤其是加價之後，佢哋會點諗？一定唔會做儍仔囉。
現實有樣嘢叫做風水輪流轉，業主勢強就避一避風頭，但強勢未必會維持很久，那時大家便知道殺雞取卵，貪字得個貧！（業主）一定唔會（知）囉。
劉兆昌
資深地產傳媒人
http://www.HKLau.com
本欄逢周五刊出