青協同旅遊事務署聯合主辦香港青年大使計劃，委任253位青年大使喺未來一年駐守香港旅客諮詢中心、海洋公園、山頂凌霄閣等地，向來港旅客推廣香港本地文化。
將喺英國倫敦升讀大學三年班嘅錢子悠，上年開始參加計劃，透露早前返港時，設計咗唔同款式明信片推廣香港南區，介紹時提到南區住咗唔少名人，包括「超人」李嘉誠、明星成龍同陳奕迅等；到英國讀書時，亦有介紹蛋撻同雞蛋仔。
將喺嶺大升讀二年班嘅高綺蔓就話，試過喺濕地公園、金紫荊廣場等地推廣香港，個人最推介九龍寨城公園、灣仔藍屋同西九文化區，因為可以認識到香港歷史，又可以睇吓不同手作市場同展覽。
已參加過兩屆計劃、將升讀港大社會科學政治及法學系三年級嘅黃雋康，則推介每年3月舉行嘅巴塞爾藝術展，話好多外國遊客都覺得好吸引喎。