【本報訊】有63年歷史的南華霓虹燈電器廠，受上月九旬「霓虹燈大王」譚華正「登報脫離父子關係」兩房家族糾紛所累，爆出欠款及工程爛尾風波。有招牌外判商投訴，工程完成半年仍無錢收，埋怨受累，擬聯合其他外判商追討欠款。原由南華負責的葵涌「星星中心」玻璃幕牆燈光工程，亦因員工離職未有新班子接手，停工兩個月後難產。曾經輝煌的本土老字號，如今已陷於癱瘓狀態。記者：呂麗嬋
「合作咗十幾年，從未試過出唔到票，打去公司問咗好多次，成日話事頭婆未簽名，2月到𠵱家，一毫子都未收到，問啲行家，先知個個都收唔到票，你話唔驚就假」。本身是判頭的興隆搭棚負責人李世豪說。南華是行內一哥，上月爆出創辦人譚華正續絃一個月，即登報與原為公司董事總經理的獨子譚浩瀚脫離父子關係的風波，公司業務由二房繼母陳書琴全面接手。
未找賬單堆積如山
據知，太子爺被踢出局，其多名得力助手亦追隨離開，令部份工程停工，判頭未找賬單堆積如山。埋怨「有汗出無糧出」的李世豪，說已多次致電南華但無果，最早一張單已是今年2月，擔心話事人易手，6萬元血汗錢追討無門，「之前追過幾次，佢哋會計話William（譚浩瀚）已冇喺公司做，簽唔到單，𠵱家啲單畀咗事頭婆跟，要等佢批」。
他謂只知事頭婆叫譚太，從未見面，「啲職員話同事頭婆都係e-mail聯絡，好少現身，講真你哋家族爭拗，邊個啱邊個錯我唔理，但無理由做咗嘢，有單有據都唔畀錢」。他說再追不到，不排除會求助收數公司或聯合其他外判商追討欠款。
「我做判頭，夥計啲糧出晒、保險又買咗，付出咗冇票返，𠵱家你唔係冇錢，係有錢冇人簽票，你話幾無奈？」他與南華合作的最後一單工程，是位於觀塘濱海街的花旗銀行天台招牌，一個月前完成拆棚，暫時不會再接南華的工程。
小型工程外判商拒再接單，大工程項目一樣爛尾。位於葵涌業成街16至18號的星星中心，是嘉理資產管理於2013年以1.6億元購入的重建項目，業主是上月上市的星星地產（1560）。據售樓書資料，貫穿大樓兩面的銀河圖案「閃爍LED玻璃幕牆設計」是賣點之一。工程原由南華負責，但由6月開始停工兩個月。
業主、工程大判聯合金輝建築及南華三方已於昨日開會，確認南華無法在限期內完成工程及提供所需工程物料，協議中止其合約，同意由其他公司接手剩餘工程。
對於有關糾紛，代表公司出席勞資調解會議的南華霓虹燈會計黃耀文表示「無身份亦無資格回應」，並稱自己出席會議，只因「人事部啲人走晒，唔通叫個清潔去」，又說「外判商啲單都係負責工程嘅前線同事負責，佢哋離晒職，我真係唔知咁多」。記者致電新任董事譚陳書琴，在截稿時未獲回覆。