喺禮拜二嘅女子5,000米初賽出現感人一幕，當新西蘭嘅咸拜倫（Nikki Hamblin）同美國嘅迪亞高絲天奴（Abbey D'Agostino）跑剩三分一路程嗰陣，佢哋意外相撞倒地。初頭睇落咸拜倫傷得較重，瞓咗喺地，迪亞高絲天奴冇即刻走咗去，而係扶起佢。跑咗一陣，原來迪亞高絲天奴膝頭傷勢都幾嚴重，坐咗喺跑道，呢次輪到咸拜倫企喺佢身邊，鼓勵佢起身跑埋全程。最後兩人互相扶持同鼓勵下齊齊完成比賽，但成績當然唔好啦；不過，兩國代表隊各自上訴，話意外影響咗跑手成績，而賽會亦判上訴得直，兩人將會出戰香港時間星期六早上進行嘅決賽。
