森巴Beats:拳手揸緊中指抗普京「黑手」

森巴Beats:
拳手揸緊中指抗普京「黑手」

今屆奧運拳擊比賽爭議不絕,先有中國拳手呂斌以為贏梗慶祝定,點知裁判宣佈對手勝利;到咗周二,疑似被屈死嘅就係愛爾蘭拳手高蘭(Michael Conlan),佢賽後除咗做不文手勢洩憤,仲夠膽辣埋俄羅斯總統普京。呢場56公斤級八強戰,高蘭面對俄羅斯拳手尼基甸(Vladimir Nikitin),三個回合都有優勢,尼基甸更被打到爆眼角;不過,三個裁判畀分都係尼基甸贏29:28。高蘭係上屆52公斤級銅牌得主兼去年世錦賽冠軍,除高舉兩隻中指做粗口手勢,賽後仲大肆批評AIBA(國際拳聯)造馬:「我有實力拎金牌,但AIBA奪走我嘅金牌。我永遠唔會再參加奧運同AIBA嘅拳賽。」高蘭仲喺twitter留言兼tag埋俄羅斯總統普京(左圖),問普京畀咗幾多錢AIBA。AIBA或者想補鑊,周三宣佈取消部份拳證同裁判嘅資格。