【本報訊】暑假的一個下午，大埔運頭塘商場內的文具店擠滿人，小孩拖着媽媽衝入舖，不消一會滿心歡喜拿着玩具車離開；白髮斑斑的婆婆帶着孫女選購中秋燈籠，與老闆閒話家常；學生哥就忙於添置開學文具。中秋將至，店內掛滿燈籠，店外就貼上「無奈清貨」的毛筆字，形成強烈對比。領展4月將商場易手，場內6間小店半年後被逼走；今年中秋，將是文具店最後一次人月兩團圓。
記者：譚靜雯
運頭塘邨1991年落成，老闆羅先生的「其昌文具」是商場開荒牛，昔日開張舊照珍藏至今，「你睇吓嗰時幾架勢，好多朋友都有送花籃嚟㗎」。25年光景轉眼過去，文具店養活一家四口，做生意之餘更與街坊變成朋友。他樂見昔日的屋邨「百厭仔」拍拖結婚生仔，再帶子女重遊舊舖，「呢個細路由細睇到佢大，以前好鬼百厭㗎……嗱嗱嗱，呢個乖仔嚟，有時睇唔過眼幫手出聲」。
店東見證孩子成家
細路哥轉眼成家立室，採訪當日乖仔帶同歲半囝囝買氣球，「以前呢度啲小朋友曳，借咗泵嚟泵波唔畀錢，我咪出吓聲，嗰時嚟買嘢老闆一定平畀我哋」。
客人要買甚麼，羅老闆銘記心中，中年叔叔一入文具店，不哼半句，羅就對太太說：「幫佢攞張麻雀紙，佢次次落嚟都係幫老婆買麻雀紙。」有街坊一買就買十卷八卷膠紙，並稱「佢（其昌）啲膠紙先襟用！」到底怎分好與壞，「日本嗰隻膠紙一搣就開，大陸嗰啲搣極都搣唔開，又唔好黐力」。
白髮斑斑的婆婆匆匆入店買香燭，記者好奇文具舖竟賣香燭，還擺放在門口當眼處，「呢啲賺唔到咩錢，幾年前街市執咗之後，啲婆仔想買支香都冇，我咪入一兩款，等佢哋唔使大熱天時行去大埔墟買」。
其昌是被逼走的小店之一，去年底才與領展續約3年，加租近三成。至今年4月商場易手，由駿昇投資（香港）有限公司以8.1億元奪得，「嗰時都有問遲吓會唔會冇得做，管理處都話冇事」；惟上月新業主突然向場內6間小店發律師信，要求小店半年內遷出。
舊客掃貨不要折扣
從不失眠的羅老闆，連續多天受逼遷困擾，「收到封信嗰刻真係晴天霹靂，我仲有兩年幾約，不停諗點解會咁，失眠咗幾晚，唔通我哋呢啲小商戶冇財冇勢，只可以任人魚肉？」
文具店外貼上「無奈清貨」的毛筆字，全部是羅生真迹。下月中秋，文具店為應節掛滿阿愁、比卡超當紅的卡通燈籠，與結業的毛筆字形成強烈對比。
為回饋街坊，文具店購物滿50元九折、300元就打八折，有街坊得悉文具店被逼走，專程來掃貨。提起街坊情，老闆忍不住哽咽：「有好多客專登返嚟買嘢，我話有八折，佢反而叫我『老闆老闆，你一定要收番足數，我專登嚟㗎』，呢啲溫情、人情味……我都唔知點講，真係好感動。」面對無理逼遷，「賺錢真係其次，最唔捨得係啲老街坊」。